Rev 13 | KYG | STEP | U'na solovala ani agi'nale'mo he ti'na mai'ne'na agovana mago afela afumo solovala anipati'mo afole ai'nige'na age'nove. Naya lole'a lokiya'amo hane'nigeno seveni'a agenopamo hane'nigeno kakolita'amo kini vaya'mogi ne'malaya agufa kakolitamo lokiya'ale'mo hane'niye. Muki agenopa'ale'mo Goti agi'agana agufa agimo Goti agi'ale'mo huno faipa huno ate'niya agi'amo avo'mo kae male'niye.

Revelation of John 13

Solovala anipati'mo afole ai'niya afela afue'mo ava gemo hu'niya gemae

1 U'na solovala ani agi'nale'mo he ti'na mai'ne'na agovana mago afela afumo solovala anipati'mo afole ai'nige'na age'nove. Naya lole'a lokiya'amo hane'nigeno seveni'a agenopamo hane'nigeno kakolita'amo kini vaya'mogi ne'malaya agufa kakolitamo lokiya'ale'mo hane'niye. Muki agenopa'ale'mo Goti agi'agana agufa agimo Goti agi'ale'mo huno faipa huno ate'niya agi'amo avo'mo kae male'niye. 2 Age'nova afela pusimo agi'amo lepatigana huno mai'nigeno aiya'ala'mo afela afumo agi'amo meyamo aiyagana huno hane'nigeno avaya'amo laiyonimogi apavayagana huno hane'niye. Nagalo'yavemo'mo afela afumo lokiya'amo alino amiteno yagaino apatesiyafe'mo alino ate'nigeno himamu'amo aliteno mai'niye. 3 Afela afumo magoke agenopale'mo amagi'nageno falisiya agufa amu'mo ale'niya'monanafa ago aleno hate'nige'apae'mo muki ma mopafi vaya'mogimo ani afela afueke'mo hapau aite'a akame hu'nae. 4 Nagalo'yavemo'mo afela afu'aite'mo yagaino apatesiya himamu'amo alino ami'niya'mofe'mo vaya'mogimo nagalo'yavelefe'mo mono hu'nae. Ani kava hu'a afela afulefe'mo mono hute'apae'mo, Ina la'mo afela afugana huno mai'niye. Ina la'mo afa'a kame huno ategaiye, hu'a hu'nae.

5 Afela afumo'a agai'a agi'ale'mo alino asaga huno ateteno'ae'mo, ala vekamo mai'nove, huno huteno Goti agi'ale'mo huno faipa huno ate'niya'mofe'mo foti tu'a kaimo agaemo afa'a yagaino apatesiyafe'mo Goti'a afa'a ageno atale'niye. 6 Agaemo Gotife'mo huno faipa huno atege Goti agi'ale'mo alino afepi atege Goti'a mai'niya kotegae'mo huno faipa huno atege koku'napi mai'naya vaya'aife'mo huno faipa huno apatege huno mai'niye. 7 Agaemo Goti vaya'amo kame huno apateteno aeno apakaseno muki nofi vaya'aitenagi muki alu apakufa'e alu apakufa'e vaya'aitenagi muki alu apake alu apakemo ne'aiya vaya'aitenagi muki alu kotega alu kotegamo mai'naya vaya'aitenagi huno yagaino apatesiyafe'mo Goti'a afa'a ategeno mai'niye. 8 Muki ma mopafi vaya'mo afa'a maisaya ya'mo ali'nisaya vaya'ai apaki'apimo avo'mo kae male'niya mukufi'mo apaki'apimo avo'mo kaeno o'male'nisiya vaya'mogimo afela afulefe'mo mono hugae. Ani mukumo ma mopamo faino ate'niya afina'mo kamiti amagi'naya sipisipi vekamo muku'amo hane'niye.

9 Apakesamo hane'nisiya vaya'mogimo mani gemo alagepa hu'a afiyo. 10 Goti'a, kalavusi hu'a apategae, huno hu'nisiya vaya'mo kalavusi hu'a apategae. Naipeleti'mo apaisage'a faligae, huno hu'nisiya vaya'mo naipeleti'mo apaisage'a faligae, huno hu'niya'mofe'mo Goti aote vaya'amogimo hosu afina'mo o'atale'a atafau'a alagi hu'a maisaya kava'mo hane'niye.

Alu afela afumo ma mopafati'mo afole ai'niya afue'mo ava gemo hu'niya gemae

11 Inagi agovana mago alu afela afumo ma mopafati'mo afole ai'nige'na age'nove. Lole lokiya'amo aikeli sipisipimo lokiya'alakana huno hane'nigeno nagalo'yavemo'a nehiya agufa gemo hu'niye. 12 Agaemo hogote afela afumo'a ali'niya agufa himamu'amo aliteno hogote afela afumo himamu'aleti'mo ge hu'niye. Agaemo ma mopafati vaya'mo alino he tino apate'nige'apae'mo hogote afela afumo falisiya agufa amu'mo ale'niya'monanafa ago aleno hate'niya afela afulefe'mo mono hu'nae. 13 Napa tu afela afumo'a no'agaya agufa aune kava'mo mago'e kava'mo hu'niye. Mago kava'mo hu'niya kava'mo'a muki vaya'ai apaulagale'mo ge hu'nigeno koku'napati'mo atamo emineno ma mopafi'mo le'niye. 14 Goti'a afa'a ategeno mai'ne'neno hogote afela afumo himamu'aleti'mo no'agaya agufa aune kava'mo mago'e kava'mo hu'niya'mofe'mo ma mopafi vaya'mo humi apate'niye. Agaemo naipeleti'mo agenopafi'mo ai'nigeno falisiya agufa amu'mo ale'niya'monanafa ago aleno hate'niya afela afumo agi'ale'mo ali'a asaga hu'a atesayafe'mo, aune'amo alo hutapa maleyo, huno hu'niye. 15 Goti'a afa'a ategeno mai'nigeno'ae'mo aune ya'mo alo hu male'naya ya'mo afa'a maisiya ya'mo ami'nigeno age ai'niye. Agaemo aune yafe'mo mono osugune hu'a nehaya vaya'aife'mo apamagiyo, huno hapa pai'nige'a apamagi'nae. 16 Agaemo afa vayanagi ala apaki vayanagi kagemi ya'api'e vayanagi kagemi ya'apimo ohane'nisiya vayanagi kalavusi ali'ya ne'aliya vayanagi afa'a mai'naya vaya'aifenagi huno lamaga lapayate'mofi lapanile'mofi hutapa alagena ya'amo hu maleyo, huno hapa pai'niye. 17 Afela afumo alagena ya'amofi agi'amofi napa'amofi hu'a o'ali'nisaya vaya'mogimo afa'a miya ofaige maketi osuge hute'a afa'a mai'nae.

18 Alagepa hu'a agete'a afi'naya vaya'mogimo mani gemo afa'a afisaya agufa gemo hane'niye. Alagepa lapakesamo hane'nisiyana afela afumo napamo afa'a lekana paiyo. Ani napamo mago vekamo napamo hane'niye. Ani vekamo napa'amo sigisi hataleti sigisiti sigisi napamo hane'niye.